A moda concisa
La vita virtuala ta po dar in sentiment da surpussanza. Tuttina na duessas ti mai perder la relaziun cun la realitad; la vita virtuala na dastga betg prender suramaun.
Tut tenor la persuna sa mussan ils emprims sintoms da dependenza en differenta moda: mancanza da sien, pegiurament considerabel da las prestaziuns en scola u en la professiun, gronda stancladad psichica u isolaziun. Sche ti passentas tes temp mo pli davant il monitur, po quai chaschunar – en il cas extrem – disturbis da mangiar e depressiuns.
Igl è fitg difficil da trair in cunfin, cur che la dependenza da l'internet cumenza propi, pertge che mintga persuna reagescha autramain. Mintgatant ston ins sa fidar da sia intuiziun. Discurra cun insatgi, sche ti has il sentiment che la vita reala sfugia or da maun. Tes geniturs u tes medi ta pon gidar. Sche ti has il sentiment ch'ina persuna dal ravugl da tes amis saja pertutgada da la dependenza dal computer e da l'internet, lura discurra cun ella senza far renfatschas e senza far inculpaziuns. Porscha plitgunsch tes sustegn ed emprova da chapir ses cumportament.
T'infurmescha, sche ti has dubis areguard tes cumportament u areguard il cumportament da tes amis. En l'internet hai numerus artitgels e paginas d'internet che tractan quest tema e che porschan soluziuns.
Tips
- Gioga mo durant in tschert temp davant il monitur e prenda temp per autras activitads.
- Igl è meglier da giugar en gruppas e betg sulet davant il computer u davant la consola da gieus.
- Fa activitads corporalas e guarda da mangiar, da baiver e da durmir avunda, per che betg ti na sajas a la fin "game over".