A moda concisa
Ozendi barattan persunas inamuradas pli e pli savens fotografias e videos privats (da sai bluts u indecents) sin via electronica. Displaschaivlamain na duran betg tut las relaziuns d'amur en perpeten – cuntrari a las datas publitgadas en l'internet, sche quellas na vegnan betg stizzadas.
Ils problems cun talas fotografias cumenzan savens en cas d'ina separaziun: Ins vegn tschiffà da quaidas da vendetga, e tuttenina po l'entir mund vesair fotografias che duevan en sasez restar privatas. E tras la pussaivladad da cundivider cuntegns daventi fitg difficil u schizunt nunpussaivel da mantegnair la controlla sur dals maletgs e videos derasads.
Cumbain ch'i dat en il fratemp applicaziuns, nua che cuntegns pon vegnir cundividids mo "durant in temp limità", ed er sche quai è ina protecziun supplementara per che fotografias na possian betg vegnir tramessas vinavant senz'auter, vegni adina a reussir ad ina persuna cun nauschas intenziuns d'arrivar en ina maniera u l'autra ad ina fotografia.
Tips
- N'emblida mai ch'ina fotografia u in video po vegnir tramess vinavant u publitgà cunter tia voluntad e senza che ti sappias quai, er sche ti has plaina confidenza en insatgi.
- T'imaginescha, tge consequenzas che quai avess e co che ti ta sentissas, sche tes geniturs, tes amis u persunas da tia scola vesessan in maletg da tai blutta u blut. Mantegna tia intimitad.
- Sche fotografias da tai curseschan cunter tia voluntad, pos ti supplitgar da tut temp il possessur da la pagina d'internet correspundenta d'allontanar la fotografia u da ta declerar, co che ti stos proceder.
- Sche maletgs u videos da tai èn en circulaziun cunter tia voluntad, pos ti er far ina denunzia cunter la persuna che ha publitgà u cundividì tals.